Kretabasa

Kretabasa 

1. Palajahin pamiteges ring sor puniki! 

Kretabasa wantah istilah Bali sané kanggén maosang indik aji kaweruhan mabasa daerah Bali, inggian indik widang linguistik miwah widang sosiolinguistik. Dadosipun, ring ajahan kretabasa puniki kawedar indik widang tata bahasa Bali miwah anggah-ungguhing basa Bali. Sajeroning mabasa Bali, wénten bebaosan sané mawasta basa pakraman miwah basa pasuitrayan. 

a. Basa Pakraman 

Basa pakraman puniki metu sangkaning genah mabaos Bali. Wénten bebaosan ring forum resmi miwah bebaosan ring pambyaran (nénten resmi). Punika mawinan wénten basa pakraman miwah basa pasuitrayan. 

Basa pakraman, inggih punika basa Bali sané kanggén mabaos ring patemon-patemon resmi minakadi bebaosan: 

1) ring paruman désa adat, 

2) ring paruman seka truna, 

3) ring ngénterang upacara agama, 

4) ring lomba pidarta utawi dharma wecana, 

5) ring kelas, ri kala guru ngajahan basa Bali. 

b. Basa Pasuitrayan 

Basa pasuitrayan, inggih punika bebaosan mabasa Bali sané nénten resmi, kanggén mabaos antuk krama Baliné ring pambyaran sarahina-rahina utawi ring patemon-patemon sané nénten resmi. Dadosipun, saluir bebaosan mabasa Bali ring patemon nenten resmi kabaos basa pasuitrayan (bahasa pergaulan). Pinaka imba sakadi bebaosan: 

1) para muridé ngraos ring kantin, 

2) para pegawé kantoran ngraos ring ruangan, 

3) para petani ngraosang toya ring cariké,

4) sopir ngraos ring penumpang, 

5) sopir ngraos ring majikannyané, 

6) miwah sané lianan. 

c. Imba Basa 

Pakraman Imba basa pakraman sané jagi katurang iriki wantah indik basa Bali alus sané kanggén mabaos ri kala ngamiletin utsawa dharma wecana. Antuk punika ngiring wacén riin teks dharma wecana ring sor puniki!